پاکستان اور کویت کے درمیان دفاعی تعاون کا معاہدہ خوش آئند، اسلامی ممالک کے باہمی تعلقات مزید مستحکم ہوں گے: مولانا عبدالرشید حجازی

ناظمِ اعلیٰ مرکزی جمعیت اہلِ حدیث پاکستان، مجاہدِ انتھک مولانا عبدالرشید حجازی حفظہ اللہ نے پاکستان اور ریاستِ کویت کے درمیان دفاعی تعاون کے معاہدے کو خوش آئند اور مثبت پیش رفت قرار دیتے ہوئے کہا ہے کہ یہ معاہدہ دونوں برادر اسلامی ممالک کے درمیان باہمی اعتماد، دفاعی تعاون اور خطے میں امن و استحکام کے فروغ میں اہم کردار ادا کرے گا۔

اپنے بیان میں انہوں نے کہا کہ پاکستان اور کویت کے درمیان تعلقات اسلامی اخوت، باہمی احترام اور دیرینہ دوستی پر استوار ہیں۔ دونوں ممالک نے ہمیشہ ایک دوسرے کے ساتھ خیرسگالی، تعاون اور مشترکہ مفادات کے تحفظ کے لیے مثبت کردار ادا کیا ہے، جبکہ یہ دفاعی تعاون دونوں ممالک کے تعلقات کو مزید مضبوط اور مستحکم بنانے میں معاون ثابت ہوگا۔

انہوں نے کہا کہ موجودہ علاقائی اور عالمی حالات میں اسلامی ممالک کے درمیان دفاعی، سفارتی اور اقتصادی تعاون ناگزیر ہے۔ ایسے معاہدے نہ صرف دونوں ممالک کی دفاعی صلاحیتوں کو مضبوط بناتے ہیں بلکہ خطے میں امن، استحکام، باہمی اعتماد اور مشترکہ سلامتی کے فروغ میں بھی اہم کردار ادا کرتے ہیں۔

مولانا عبدالرشید حجازی حفظہ اللہ نے اس معاہدے کا خیر مقدم کرتے ہوئے امید ظاہر کی کہ پاکستان اور کویت مستقبل میں تعلیم، تجارت، سرمایہ کاری، دفاع اور دیگر شعبوں میں اپنے تعلقات کو مزید وسعت دیں گے، جس سے دونوں ممالک اور پوری امتِ مسلمہ کو فائدہ پہنچے گا۔

انہوں نے مزید کہا کہ مسلم ممالک کو موجودہ چیلنجز کا مقابلہ کرنے کے لیے اتحاد، باہمی تعاون اور مشترکہ حکمتِ عملی کو فروغ دینا چاہیے، کیونکہ امتِ مسلمہ کی قوت اس کے اتحاد اور باہمی اعتماد میں مضمر ہے۔