قیادت

سینیٹر پروفیسر ساجد میر پہلی بار 1992ء میں امیر جماعت منتخب ہوئے تھے اس کے بعد 1997ء، 2002ء، 2006ء،2011ء،2015ء اور2020ء میں امیر منتخب ہوئے۔اب2025ء میں ایک بار پھر بلا مقابلہ امیر منتخب ہو کر مسلسل آٹھویں مرتبہ امیر جماعت ہونے کا اعزاز آپ کے حصے میں آیا۔آپ 2اکتوبر1938کو سیالکو ٹ میں پیدا ہوئے، مناظر اسلام مولانا محمد ابراہیم میر سیالکوٹی آپ کے حقیقی دادا چوہدری اللہ دتہ میر کے بڑے بھائی تھے (یوں مولائے میر رشتے میں امیر محترم کے دادا ہوئے)۔آپ دینی و دنیاوی طور پر اعلیٰ تعلیم یافتہ ہیں۔ گورنمنٹ مرے سیالکوٹ، گورنمنٹ کالج لاہور اور پنجاب یونیورسٹی جیسے مؤقر اداروں سے آپ ایم اے انگلش اوردیگر سندات کے حامل ہیں۔آپ نے ایڈیشنل بی اے بھی کر رکھا ہے۔دینی تعلیم آپ نے جامعہ ابراہیمیہ سیالکوٹ اور دارالعلوم تقویة الاسلام لاہور سے حاصل کی۔ سیاسی و تنظیمی زندگی میں آنے سے پہلے آپ پاکستان اور نائیجیریا جیسے ممالک میں انگلش کے استاد کی حیثیت سے تدریسی خدمات سر انجام دیتے رہے۔ آپ نے گورنمنٹ مرے کالج سیالکوٹ میں تدریسی دورانئے میں حفظ القرآن کی سعادت بھی حاصل کی۔آپ 1994ء سے تاحال رکن سینیٹ بھی منتخب ہوتے چلے آرہے ہیں۔ آپ شائد واحد رکن سینیٹ ہیں جن کا خرچہ ضروری کاغذات کی فوٹو اسٹیٹ پر کاپیوں پر ہی آتا ہے۔( مسلم لیگ ن کے سربراہ محمد نواز شریف امیر محترم کواز حد احترام کی نظر سے دیکھتے ہیں اور کاغذات نامزدگی جمع کروانے کے موقع پر خود ہی فون کر دیتے ہیں کہ آپ کاغذات جمع کر وا دیں۔)آپ تین درجن سے زائد عالمی کانفرنسز سے خطاب کر چکے ہیں، رابطہ عالم اسلامی کی سپریم کونسل کے معزز ممبر ہیں۔آپ کی کتاب ”عیسائیت مطالعہ و تجزیہ” آپ کی وسعت مطالعہ ، موضوع پر گرفت اور اپنے احساسات کو الفاظ کے قالب میں ڈھالنے کی فن کی دلیل ہے۔ یہ کتاب عالمی شہرت حاصل کر چکی ہے۔ اس کے ساتھ ساتھ آپ کے خطبات و خطابات کی بھی تین جلدیں شائع ہو کر قارئین سے داد تحسین وصول کر چکی ہیں۔

پانچویں مرتبہ ناظم اعلیٰ کے منصب کیلئے منتخب ہونے والی شخصیت ڈاکٹر حافظ عبد الکریم حفظہ اللہ کا تعلق ڈیرہ غازی خان سے ہے۔ آپ امسال پانچویں مرتبہ ناظم اعلیٰ منتخب ہوئے ہیں۔ اس سے قبل آپ 2006ء،2011ء،2015ء اور 2020ء میں بالاتفاق ناظم اعلیٰ مرکزی جمعیت اہلحدیث پاکستان منتخب ہو چکے ہیں۔ آپ کورائی بلوچ قبیلے سے تعلق رکھتے ہیں۔ ڈیرہ غازی خان میں آپ کی تعلیمی خدمات کی وجہ سے آپ کو ”ڈیرہ غازی خان کا سرسید” کہا جاتا ہے۔آپ بھی دینی و دنیاوی اداروں سے اعلیٰ تعلیم یافتہ ہیں۔ آپ کے تعلیمی کیرئیر میں جہاں سعودی جامعات کی سندات فضیلت موجود ہیں وہاں اسلامیہ یونیورسٹی آف بہاولپور سے آپ پی ایچ ڈی ڈگری ہولڈر ہیں۔ آپ ڈیرہ غازی خان میں اپنی سیاسی قوت کا بھرپور مظاہرہ فرما چکے، آپ نے ڈیرہ غازی خان کے جاگیرداروں، وڈیروں اور نوابوں کے مقابلے میںوہاں کی عوام کو اپنی محنت، محبت اور اخلاص سے فتح کیا۔ ایم این ا ے منتخب ہوئے۔ ایک بار آپ رکن سینیٹ بھی منتخب ہو چکے ہیں، اسی دوران آپ وفاقی وزیر مواصلات بھی رہے۔آپ کی رفاہی و سماجی خدمات کا دائرہ بھی بہت وسیع ہے۔کشمیر کے زلزلہ زدگان ہوں یا جنوبی پنجاب کے سیلاب متأثرین آپ نے ایک ہمدرد اور خیر خواہ سماجی شخصیت کے طور پر خود کو منوایا۔ باوقار و باکردار ناظم اعلیٰ بلند پایہ کاروباری شخصیت بھی ہیں۔ آپ کا سرمایہ تعلیمی اداروں، مساجد و مدارس کی تعمیر میں بھی صرف ہوتا ہے۔ آپ کی جماعتی خدمات کی بھی ایک طویل داستان ہے۔مرکزی جمعیت اہلحدیث کے صوبائی ناظم اعلیٰ سے مرکزی ناظم اعلیٰ تک کا سفر اپنے جذبہ خدمت اور علم و علماء سے محبت کی بنیا د پر طے کیا، امیر محترم کی قیادت میں پیغام ٹی وی جیسا عظیم الشان تبلیغی مرکز قوم کو دیا۔مرکزاہلحدیث کی تعمیر و توسیع میں آپ کا کردار ناقابل فراموش رہے گا۔ مرکز اہلحدیث لاہور کی شاندار مسجد اور کانفرنس ہال آپ کی خصوصی توجہ کا نتیجہ ہے۔ ملک بھر میں سینکڑوں مساجد، بیسیوں مدارس اور تعلیمی مراکز کی نہ صرف بنیاد رکھی بلکہ انہیں چلانے میں اہم کردار ادا کر رہے ہیں۔ سیلاب، زلزلہ اور دیگر قدرتی آفات کی آزمائشوں میں آپ ایک انسانیت کے ہمدرد کے روپ میں سامنے آتے ہیں۔